BACOLOD CITY — Naglapad pa ang hulumayan sa sur nga bahin sang probinsya sang Negros Occidental nga apektado sang grain bugs.
Sa una nga data sang Office of the Provincial Agriculturist sang nagligad nga semana, apektado sang grain bugs ang tunga sa ektariya nga hulumayan sa ciudad sang Kabankalan.
Miyerkules nga adlaw, ginpahayag ni Provincial Agriculturist Atty. Japhet Masculino nga apektado naman sang grain bugs ang pila ka ektariya sang hulumayan sa ciudad sang Sipalay.
Bangud sini, naghingyo na ang OPA sang 50 ka pakete sang bulong nga metarizium sa Department of Agriculture Region 6 agud nga amo ang i-spray sa apektado nga mga hulumayan sa mas madali nga panahon.
Nagalaom man si Masculino nga indi na maglapta sa iban pa gid nga banwa ukon ciudad ang makahalalit nga insekto.
Paathag sang Provincial Agriculturist, ang grain bugs ang naga-atake sa humay kun nagagatas ini rason nga upahon ang patubas.
May kaangtanan sini, nagpanawagan si Masculino sa mga mangunguma nga mag-aligmat kag sikyaron gid ang hulumayan kun may presensya sang grain bugs kag gilayon nga magreport sa agriculture’s office.
