Ginpahayag ni Atty Jayvee Hinlo nga kun magwithdraw ang iban nga pungsod sa International Criminal Court (ICC) mahimo nga ma-untat ang pagpadalagan sang korte.
Nahibaluan nga aktibo nga gina-engganyo ni US President Donald Trump ang iban nga mga pungsod nga magwithdraw sa ICC.
Sa interview sang Bombo Radyo kay Hinlo, ginpahayag sini nga ang tatlo ka mga mabaskog nga pungsod lakip na ang US, China kag Russia nga indi miyembro kag nagakontra sa ICC ang may dako nga epekto sa status sang ICC bangud sila ang sarang nga makahimo sang political kag economic pressure kasubong man ang military pressure agud mapauntat ang korte.
Apisar nga sang 2018 nagwithdraw na ang Pilipinas sa ICC, suno kay Atty Hinlo nga nagakooperar sa gihapon ang pungsod sa ICC.
Ini bangud kontra sang Marcos administration si former President Rodrigo Duterte kag luyag nila nga matigayon ang pagpapriso sang anay presidente sa ICC.
Para sa abogado, indi na dapat pa mangin miyembro ang Pilipinas sa ICC bangud functional man ang korte sang pungsod nga suno sa iya, dapat amo mismo ang maga-prosecute sa mga Pilipino nga nakakumiter sang sala.
Sa pihak sini, ginpahayag ni Atty Hinlo nga kun magwithdraw ang halos tanan nga mga miyembro sa ICC, posible nga mauntat na ang pagpadalagan sini bangud indi na ini makasarang financially.
Ini bangud ang ginapaswelo sa mga abogado amo ang kwarta nga ginahatag sang kada pungsod nga miyembro sang ICC.
