Ginkilala sang former rebels ang identity sang pito ko mga napatay nga katapo sang New People’s Army sa Barangay Gatuslao, Candoni, Negros Occidental.
Sa interview sang Bombo Radyo Bacolod kay Brig Gen Joey Escanillas, commander sang 302nd Infantry Brigade sang Philippine Army, kagab-i ginpalantaw nila sa former rebel ang napatay nga remnants sang dismantled nga South West Front.
Ang napatay ang ginalakipan nanday Dindo Pogoy alias Ping; Bontol Marani alias Fita, nga ila medical officer; Pitla Anicito alias Jr, nga nakuhaan man sang ID; alias Jugar; alias Nonoy; alias Jacob; kag alias Katkat lunsay mga lalaki.
Aminado si Escanillas nga alias pa lamang ang ila nakuha gikan sa apat ka napatay kag indi paman sila segurado kun matuod na nga pangalan ang nakuha sa tatlo.
Sa karun wala paman sang pamilya nga nakadangop agud magclaim sang bangkay.
Panugyan sini nga kun nahadlok nga magdangop sa militar, ang pamilya ang sarang makapangayo sang bulig sa ila himata ukon magdangop sa kapulisan kag local government units.
Ang pamilya ang makabatun man sang bulig gikan sa ahensya sang gobyerno para sa pagpalubong sa mga biktima sang sala nga ideolohiya.
Apang kun malawigan na kag wala sang pamilya nga magaclaim, ang Candoni Municipal Government na mismo ang magapalubong sa napatay nga rebelde.
Ang engkwentro ang natabo sa Palm Oil Plantation sa boundary sang banwa sang Candoni kag Ilog pasado alas-3:00 kahapon sang kaagahon.
Narecover sa encounter site ang lima ka M16 rifles, duha ka AK-47 rifles, kag isa ka M653 rifle, granada, improvised explosive device kag rifle grenade.
Magluwas diri may narecover man nga pila ka galon sang gasolina.
Sa karun nagapadayun pa ang clearing operation sang 47th kag 15th Infantry Battalion sa palibot sang encounter site.
