Ginkumpirmar sang manager sang BACH Project nga estable na ang kondisyon ni Tiktok ang ido nga gintiro sang Indian Target sa Barangay Blumentritt, Murcia kun sa diin gin-operahan agud makuha ang lima ka bala sang nasambit nga pana sa lawas sini.
Sa interview sang Bombo Radyo Bacolod kay Christopher John Bertol, apisar nga estable na ang ido apang nagapadayon ang medication sini sa iya nga mga pilas nga gin-igo sang Indian Target.
Suno kay Bertol ginamonitor pa sang mga veterinarians sa Juan Veterinary Clinic kun sa diin ini gin-operahan kag ginabantayan kun san-o gid ini mastable ang kondisyon sini.
Ginpahayag man sini nga nagalakat-lakat naman ini apang makita nga nasakitan sagihapon.
Suno diri, ang ido ang nakitaan man sang infection bangud sa bala sang Indian target.
Suno diri, nadugayan man antes narespondehan bangud duha na kaadlaw ang nakaligad matapos ginpost sa social media antes ginreport sa BACH.
Sang Domingo mga alas 11:00 ang takna sang gab-i niya ini ginrescue.
Suno sa tag-iya nagpuli nalang ang ido nga nagahibi bangud nga madamo na sang bala sang Indian Target sa lawas sini.
Ang ido sang ginkuha niya ang nagapaluya na.
Suno diri, ang ido ang nagapasakit na kag indi mahikap bangud nagaitom na kagb nagahabok pa ang pilas.
Ang tag-iya sang ido ang bata pa kag isa ka estudyante kun sa diin nagpangayo sang bulig paagi sa iya tiya nga nagreport sa BACH sa sitwasyon sang ido kun sa diin ginbuligan man sang animal welfare group.
Suno kay Bertol sa imbestigasyon sini indi lang isa ang naghimo sa pagtiro sang Indian target bangud nga lima ka pana ang nag igo sa ido kag kun isa lang mapalagyo na ang ido gani ginalantaw sini nga nacorner ang ido.
Ginaestoryahan pa sa karun kuns diin ibutang si Tiktok sa tion nga fully recovered na ini.
Samtang may kabug-usan na nga P245,000.00 ang padya sa makatudlo sa kun sin o ang nagtiro sa ido.
Ginapanawagan man nga ini ang GCASH number sang BACH PROJECT #09121419920 kag wala na sang iban bangud may yara sang nagkawat sang picture kag lain ang ginbutang nga number sang money wallet kun sa diin may yara na sang nakabaton sang kwarta apang indi man sa nasambit nga animal welfare group nagkadto. Samtang … Sa pihak nga bahin… nagmando na ang alkalde sa banwa sang Murcia, Negros Occidental sa mga kapulisan sang banwa nga imbestigaran agud nga matumod ang nagtiro sang Indian Target nga si Tiktok.
Sa interview sang Bombo Radyo Bacolod kay Murcia Municipal Mayor Gerry Rojas, nagmando na ini sa hepe sang Murcia Municipal Police Station nga imbestigaron agud nga matumod kun sin-o ang responsable sa pagpaniro sa ido kag ini ang nablotter naman.
Suno kay Rojas, nagapadayon ang ila nga imbestigasyon kag naghatag pa ini sang reward money nga P10,000 para sa kun sin-o makatudlo sa pagpaniro sa ido.
Ginalantaw sang alkalde nga indi madugayan mahibaluan gid kun sin-o ang nagtiro sang Indian target sa ido.
Nagtawag man ini sa Punong Barangay sang Barangay Blumentritt nga hibaluon kun sin-o man ang may kahimuan sa ido.
Ang post kay Tiktok ang nagviral na tubtob nga nakalab-ot naman gani sa igtalupanggod ni Senator Grace Poe.
Nagpanawagan man ini sa nagtiro sang Indian Target sa ido nga magsungka sa kapulisan ukon sa barangay agud nga mahibaluan ang rason sang pagpamintas sini sa ido.
Ini man ang una nga kahigayunan nga may natabo nga animal cruelty sa nasambit nga banwa.
Suno sa alkalde sa tion nga matumod ang suspek nga nagpamintas sa ido pasakaan ini sang kaso agud nga matagaan sang nagakaigo nga leksyon.
