BACOLOD CITY — Ginakabig ni Negros Occidental Governor Alfredo Marañon Jr. nga pinakapinasahi nga State of the Nation Address sang mga presidente ang ikaduha nga SONA ni Presidente Rodrigo Duterte sang Lunes sang hapon.
Suno kay Marañon, si Duterte ang sahi sang lider nga kinahanglan sang Pilipinas bangud makita sa iya ang kaisog kag kabakod.
Sa sitwasyon sa karun sang pungsod suno sa gobernador, nagakadapat lamang nga madasig magdesisyon ukon decisive ang nagapungko nga presidente.
Suno kay Marañon, si Duterte ang ‘the right president at the right time’.
Sa pihak sang iya kinaiya, nagapati ang opisyal nga dapat sa gihapon nga buligan sang mga Pilipino ang presidente.
Samtang nagalaom naman ang gobernador nga magasanyog pa gid ang pagpaniktik ukon intelligence monitoring sang mga kapulisan agud nga indi malutsan sang mga kontra sang gobyerno.
Ini ang kasunod sang ambush sa Guihulngan City nga ginkamatay sang anom ka mga pulis.
Suno kay Marañon, mahimo nga may kakulangan ang mga kapulisan bangud malutsan man sila gihapon.
