![](https://img.bomboradyo.com/bacolod/2021/10/NO-VACCINE-NO-PAY-POLICY.jpg)
Ginakabig sang tagpamaba sa Trade Union Congress of the Philippines (TUCP) nga iligal, immoral kag indi makatawo nga polisa ang pagpatuman sang no vaccine no salary scheme sa mga negosyo.
Suno kay Alan Tanjusay, nakabatun ang TUCP sang reklamo sang nakaligad nga semana gikan sa pila ka mga empleyado sa kaangay nga pagpatuman.
Nagdangop ang mga ini sa ahensya bangod wala ginhatag sa mga ini ang sweldo para sa 15 ka adlaw nga pagtrabaho bangod ginarequire sa mga ini ang vaccination card.
Suno kay Tanjusay kapin 12 ka mga empleyado ang nagdangop sa ila, kag nagatrabaho sa isa ka dako nga food company sa nasidlangan nga bahin sang Luzon.
Sa TUCP ang mga ini nagpangayo sang bulig bangod nahadlok ang mga ini nga mabulgar ang ila identity kun sa otoridad magapalapit kag sila ang balusan sang employer ukon management ukon ma-terminate sa trabaho.
Nagahingyo naman ang TUCP sang bulig sa Department of Labor and Employment (DOLE) nga imbestigaran kag maghimo sang tikang angot sa reklamo.
Ginahikutar man sang mga ini ang ahensya nga magpagwa sang labor advisory nga amo ang magaserbe nga paandam ukon preventive measure agud malikawan ang kaangay nga pagpatuman.
Nagapati si Tanjusay nga dako ang mabulig sang intervention sang DOLE agud matapna ang paglapta sang mga illegal schemes.
Nabaton naman ni Labor Secretary Silvestre Bello III ang reklamo kag ginpromisa sini nga pagahimuan nya ini sang tikang.
Dugang pa nga promisa sang tiglikom nga magapagwa ini sang advisory subong nga semana maykaangtanan sa kaangay nga mga polisa.