Ginafollow-up na sang mga kapulisan ang mga testigo sa kamatayon sang isa ka balo nga babayi nga nasapwan nga wala sang kabuhi kag nakalubong sa duta sa banwa sang Ilog nga ginapahayag nag-inom kaupod ang iya anay live-in partner sang Miyerkules.
Madumduman nga ang 60-anyos nga biktima nga si Melba Paglumotan sang Sitio Tabionan, Barangay Tabu, Ilog, Negros Occidental ang ulihi nakit-an nga nagainom upod ang iya anay live-in partner nga ginabanta naga-edad sang 45 tubtub 46 apang wala na nakapauli ang biktima.
Sang Biyernes, nasapwan ang biktima nga nakalubong kag natabunan sang mga dahon sang tubo, 200 metros ang kalayuon nagikan sa balay sini kag natabunan sang duta kag mga dahon sang tubo.
Apang bangud nagalabaw ang tiil sini, nakit-an sang mga residente ang bangkay.
Sa pag-usisa sang Ilog Municipal Police Station, ang anay live-in partner sang biktima ang kaupod sini nga nag nainom kag humalin sang Enero 2, wala na nakit-an sa ila lugar ang lalaki.
Bangud sini, person of interest sa karon sang kapulisan ang live-in partner.
Nahibaluan nga ginbulagan sang biktima ang live-in partner sang ulihi nga semana sang bulan sang Disyembre bangud may iban naman ini nga karelasyon.
Sa interview sang Bombo Radyo kay Police Major John Ganzon, hepe sang Ilog Municipal Police Station, ginpahayag sini nga ginahanda na ang mga ebidensya kag ang pagkuha sang testimonya sang mga witness agud mapreparar ang kaso batok sa anay live-in partner ni Paglumotan nga kilala lang sang mga residente sa alias nga Binoy.
Si alias Binoy ang taga-Himamaylan kag ginatsekyar pa sang mga otoridad kun may yara ini sang pending warrant of arrest sa nasambit nga ciudad.
Suno sa hepe, indi luyag sang pamilya ni Paglumotan nga ipa-autopsy ang bangkay sini apang sa initial nga imbestigasyon, ginlampusan kag ginlubag ang liog sang biktima.
