BACOLOD CITY – Luyag sang bag-o nga Commissioner sang National Youth Commission nga liwat buhion ang mga youth organizations sa pungsod.
Sa exclusive interview sang Bombo Radyo kay NYC Commissioner Rhea Baladjay Peñaflor, ginpahayag sini nga luyag sini ang matuod-tuod nga kolaborasyon ukon pagbinuligay upod sa mga nagaeksister nga youth organizations kag liwat nga mangin aktibo ang mga ini.
Ginpabutyag ni Peñaflor nga bilang tiglawas sang mga pamatan-on sang Visayas, indi sini maubos sa paglibot ang bug-os nga lugar agud makig-angot sa mga pamatan-on apang kun aktibo na ang mga grupo sang mga hubenes, mas mahapos nga makalab-ot sa iya ang ila mga problema kag panginahanglanon.
Sa sini, mangin mahapos man para sa iya ang paghatag sang bulig agud matib-ong ang kawsa sang kada organisasyon.
Handum ni Peñaflor nga mahanas sang maayo ang leadership skills sang mga pamatan-on bangud sila man ang mangin lideres sang pungsod sa palaabuton.
