Balantayan suno sa tagpamaba sang House Prosecution panel ang pagtalakay sa kun paano gingastos ang mga gin-encash nga confidential funds sang Department of Education kag Office of the Vice President sa pagpadayun sang impeachment trial ni Vice President Sara Duterte sa masunod nga semana.
Sa interview sang Bombo Radyo Bacolod kay Lanao del Sur 1st District Representative Zia Alonto Adiong, spokesperson sang House Prosecution Panel, na-establish na sa nauna nga hearing sang Article 1 ang kamatuoran sa ‘unusual’ nga encashments.
Paathag sang kongresista nga indi withdrawal ang ginhimo, bangod wala man sang nakadeposito nga kwarta ang DepEd kag OVP sa Land Bank of the Philippines, sa baylo encashment gikan sa gin-issue nga tseke ang natabo, nga nagdangat sa P612.5 million.
Suno diri, ang pag-encash sang mga special disbursement officer partikular na ni Gina Acosta para sa OVP kag ni Edward Fajarda sa DepEd sa mando ni VP Sara ang nagapamatuod naman nga nakakuha sila sang kwarta sa bangko.
Dugang pa ni Adiong nga makonsiderar na nga husto ang proseso bangod wala man nagpatigayon sang cross examination ang depensa, sa baylo sila ang naghatag na lamang sang stipulation.
Gani ang paga-kalkalon na lamang sa masunod nga semana amo ang kun paano gingastos ang dako nga balor sang kwarta.
Pahanumdom sang konsehal nga indi mahapos magpangita sang assets ukon informant gani kwestyon kun paano gilayon na-ubos ang dako nga balor sang confidential funds.
Tumuron man kun sin-o ang mga nakadtuan sang kwarta, ilabi na nga may mga irigularidad sa mga nakapirma nga nagbatun kaangay sang wala sang pangalan sa Philippine Statistics Authority, palarehas nga pangalan apang lainlain ang pirma, lainlain ang pangalan apang palarehas ang pirma, kag may-ara pa sang isa lamang ka persona nga nagbatun sang kwarta gikan sa lainlain nga probinsya sa parehas lamang nga adlaw.
May-ara pa nga naggwa nga gingamit ang pondo sa pagrenta sang safehouse, nga kwestyon man kun diin gingamit bangod indi man pwede nga makilal-an sang asset ang iban pa nga asset, gani indi sila maupod sa isa ka balay.
Kasubong man talakayon ang paagi sang liquidation sang budget, kun sa diin gikan sa Commission on Audit ang ila nga mangin witness.
