BACOLOD CITY — Nagpangabay sa mga pumuluyo ang mga opisyal sang banwa sang Candoni nga likawan ang pagpalapta sang indi verified nga impormasyon nga makapasala sa iban nga mga residente.
Ini ang panawagan ni Nicholas Lachica, head sang Candoni Assistance on Rescue and Emergency Services, kasunod sang kakugmat nga nabatyagan sang mga residente bangud sa impormasyon nga atakehon sang mga miyembro sang New People’s Army ang Candoni Municipal Police Station kag ang munisipyo sang banwa.
Sa naggwa nga impormasyon nga naglapta naman sa social media halin sang Domingo, ginapahayag nga indi magnubo isa ka gatos nga NPA ang magalusob sa Candoni kag indi ini masarangan sang pwersa sang kapulisan.
Suno kay Lachica, tuman ang kakugmat nga nabatyagan sang mga pumuluyo kun sa diin may pila ka pamilya halin sa kaumahan nga nagbakwit sa banwa kag maayo lang gani bangud naumpawan kag nagbalik na sa ila tagsa ka balay.
Nadugangan pa gid ini sang Lunes sang gab-i bangud sang nagluntad nga power interruption.
Sa karun, gina-locate pa sang mga otoridad ang ginhalinan sang impormasyon.
Pangabay ni Lachica, salaon ang nabaton nga impormasyon kag indi na ini paglaptahon kun wala man lang sang kamatuoran.
Sa pagpakig-angot sang Bombo Radyo kay Major General Jon Aying, commander sang 3rd Infantry Spearhead Division sang Philippine Army, ginpahayag sini nga nagpadala na sang reinforcement sa Candoni ang Police Regional Office 18 kasunod sang amo nga impormasyon.
