Nagpahanumdom ang Iglesia ni Cristo (INC) nga sila ang nagabantay sa kun ano ang ginahimo sang gobyerno angot sa flood control scandal, tatlo ka bulan matapos sang una nga pagpanawagan para sa transparent kag concrete action batok sa kurapsyon.
Sa video statement ni INC spokesperson Brother Edwil Zabala, indi dapat baliwalaon ang mga bag-o nga mga testimoniya may kaangtanan sa kurapsyon sa pondo sang gobyerno.
Dugang pa sini nga makaligad sang tatlo ka bulan humalin sang nagpatigayon sang rally, wala gid sang nakita nga kongkreto nga solusyon sa problema sa kurapsyon.
Pahayag sini nga imbes nga lagson kag kasuhan ang mga may kaangtanan, ang mga nagahatag pa sang impormasyon kag testigo amo ang gina-ipit.
Ini man ang rasun kun ngaa tubtob sa karun, indi makita ang gina-alegar masobra trillion pesos nga gintalana para sa flood control project kag iban pa nga proyekto sa pungsod.
Suno diri, ang ginapangita sang mga dapat mag-imbestiga amo ang mga hitabo nga makabulig agud malikaw ang atensyon sa matuod-tuod nga isyu.
Madumduman nga ginatos ka libo ang nag-upod sa duha ka adlaw nga rally nga gin-organisar sang INC sang Nobyembre 16 kag 17, nga nakafocus sa demand sang kongkreto nga tikang batok sa kurapsyon, partikular na sa maanomalya nga flood control projects.
Suno sa INC official, nagahulat sang resulta ang publiko sa deklarasyon sang Senate Blue Ribbon committee nga sila ang magasunod sa kun diin padulong ang ebidensya, partikular na sa paggwa sang rebelasyon sang ex-Marines sa pagdeliver sang mali-maleta nga kwarta.
Suno kay Zabala, wala sang makita nga maathag nga tikang agud pasanyugon pa ukon tapuson ang imbestigasyon.
Kwestyon sini kun ano pa nga ebidensya ang ginapangita agud seryoso nga lagson ang mastermind sa kurapsyon.
Paninduga ni Zabala nga padayun nga maga-demand sang resulta kag accountability ang mga pumuluyo, tuhoy sa ginkawat nga kwarta gikan sa kaban sang pungsod.
