BACOLOD CITY – Nadala pa sa hospital apang ginbawian sa gihapon sang kabuhi ang isa ka inmate matapos gin-alegar nagbato sa mga jail guards nga nagpatigayon sang Oplan Galugad ukon Greyhound operation sa Metro Bacolod District Jail las-4:00 kaina sang kaagahon.
Una diri, gin-usisa sang ginhugpong nga pwersa sang Philippine Drug Enforcement Agency (PDEA), Bacolod City Police Office (BCPO), kag Bureau of Jail Management and Penology (BJMP) ang bilangguan kun sa diin may nakumpiskar nga drug paraphernalia kag improvised nga mga patalom.
Suno kay BJMP Negros Island Region Director Jail Senior Supt. Alberto Balauag, ini ang kasunod sang padayon nga pagpasulod sang ilegal nga druga kag pagpanahor sang mga preso, magluwas pa sa pagpangakig sang iban bangud luyag sang mga ini nga pasudlon ang ila mga live-in partners ukon mga kerida apang wala ginapasugtan bangud hugot ini nga ginadumilian sang kasuguan.
Ginsaylo sa Negros Occidental District Jail (NODJ) ang 38 ka mga inmates nga ginpahayag mayores ukon lider sang mga preso kag gin-alegar nagapanguna sa pagpasulod sang druga apang nagbato ang mga ini rason nga napilitan ang jail guards nga sakiton ang mga ini.
Wala ginpalad nga mabuhi ang inmate nga si a certain Jocjoc bangud gin-alegar sa sobra nga pagkastigo.
Wala na naghatag sang dugang nga detalaye si Balauag bangud nagapadayon pa ang imbestigasyon.
