Bangud sang pagsaka sang kaso sang nagpositibo sa coronavirus disease ukon Covid-19 sa Pilipinas, ginrekomendar na sang Interagency Task Force Against Coronavirus sa Bacolod nga ireschedule ang pag-abot sang mga Japanese recruiters sa probinsiya sa masunod nga semana.
Sa interview kay Joemarie Vargas, Executive Assistant to the Mayor kag Cluster Head sang City Disaster Risk Reduction and Management Office (CDRRMO) kag miembro man sang Task Force, ila ginarekomendar nga ireschedule na lang ang pag-abot sang mga Japanese recruiters.
Nahibaluan ang Japanese recruiters ang magapadulong sa Murcia sa masunod nga semana kag magapang-recruit sang kapin 500 ka mga skilled workers.
Suno kay Vargas, bisan nga Murcia ang padulungan sang mga ini, magalabay man sila gihapon sa Bacolod Silay Airport.
Nahibaluan nga ang Japan ang isa man sa mga pungsod nga apektado sang coronavirus.
Samtang magluwas diri, ginrekomendar man sang Task Force nga kun posible suspendiron na man lang nga moving up kag graduation ceremonies sini nga pagtapos sang school year.
Apang suno kay Vargas, yara naman sa gihapon sa Department of Education (Dep-Ed) ang desisyon tuhoy diri.
