Ginsulod sang kawatan ang stockroom sang isa ka bangko nga ginabutangan sang mga armas luthang sang mga gwardiya sa Guanzon Street, Barangay 1, Kabankalan City.
Sa interview sang Bombo Radyo kay Police Lt. Dennis Melgarejo, deputy chief of police sang Kabankalan City Police Station, pasado alas 7:00 sang aga sang Hulyo 4, nadiskubrehan na lamang sang security guard on duty nga ginsulod sang wala pa makilal-an nga suspetsado ang stockroom kag nag-agi ini sa buho nga ginkuhaan sang airconditioner kag gintabunan lamang sang plywood.
Ang stockroom ang nahamtang sa second floor kag ang mga bala ang yara sa sulod sang drawer sang lamesa.
Nakuha sang kawatan ang 13 ka mga live ammunition sang 12 gauge shotgun nga ginapanag-iyahan ni Gilbert Vinson; 11 ka mga live ammunition sang 12 gauge shotgun nga ginapanag-iyahan ni John Pabalan; kag 10 ka mga live ammunition sang nasambit nga armas luthang nga ginapanag-iyahan ni Arvin Cabacoy, lunsay mga security guard sang bangko.
Ang nasambit nga mga live ammunition ang gin-issue sa nasambit nga mga security guard bilang kabahin sang ila trabaho.
Ginkumpirmar naman ni Melgarejo nga indi inside job ang natabo.
Sa karun nagapangayo pa sila sang kopya sang CCTV footage sa management agud matumod ang suspetsado.
