Patay ang isa ka lalaki nga nagasakay sa motorsiklo matapos gintiro sang wala makilal-an nga suspek nga nagasakay man sa motorsiklo sa Lacson Extension, Barangay Sincang-Airport, Bacolod City kaina alas 3:30 ang takna sang kaagahon.
Sa interview sang Bombo Radyo Bacolod kay Police Captain Sherwin Galupar, station commander sang Bacolod Police Station 8, natumod ang biktima paagi sa himata sini nga nagpadulong sa punerarya kag siya ang ginkilala kay alyas Jojo, 46 anyos, single, wala sang trabaho kag residente sang Purok Anin, Barangay Pahanocoy, Bacolod City.
Suno kay Galupar, sa imbestigasyon natukiban nga sa nasambit nga tion ang biktima ang may katransaksyon ang wala natumod nga suspetsado sakay sa motorsiklo kag hinali nalang ini nga gintiro.
Ginalantaw nga anum ka beses ini nga gintiro bangud may na-recover ang operatiba sang Scene of the Crime Operation (SOCO) nga anum ka basiyo sang bala.
Matapos ang krimen ang wala makilal-an nga suspetsado ang nagpalagyo padulong sa bahin sang Barangay Alijis.
Suno diri, gilayon man sila nagtawag sang SOCO kag medical responder apang gindeklarar nga wala na sang kabuhi ang biktima.
Nagpatigayon man sila sang dragnet operation agud nga madakpan ang suspetsado.
Ang biktima ang may yara man sang ginapangatubang nga mga kaso kag may nakuha man diri ang mga kapulisan nga armas-lut
Wala pa sang natumod nga persons of interest kag padayon pa ang imbestigasyon kag backtracking sang mga kapulisan.
