Patay ang aktibo nga miyembro sang Philipine National Police nga na-assign sa Sagay City Police Station matapos nga gintiro sang pito ka tuig sini nga bata, kahapon alas- 2:30 sang hapon sa Purok Eba, Brgy Andres Bonifacio, Sagay City, Negros Occidental.
Ang biktima ang ginkilala nga si Police Staff Sergeant Lernie Alacha, 44 anyos kag residente sang nasambit nga lugar.
Sa interview sang Bombo Radyo sa live-in partner sang pulis nga si Iren Dayanan, nagapanyaga sila nga duha kaupod ang ila bata nga pito ka tuig kag hinablos ni Iren.
Samtang nagalantaw sa Tiktok sa cellphone ni Iren may yara sang nakita si Lernie nga ginakaselos sini.
Nagluntad ang argumento sa tunga nila nga duha tubtob nga ginkuha ni Lernie ang Glock 17 pistol caliber 9mm sini nga armas.
Nagpahayag pa si Lernie nga patyon sini si Iren kag kasunod sini amo nga utason niya ang iya kaugalingon nga kabuhi.
Wala nanotisyaran sang duha nga ginkuha sang bata ang M16 rifle kag ginkasa apang wala naglupok.
Samtang, nag-agaway naman sang pusil si Lernie kag Iren, nagtabog ang caliber 9mm kag nagsinggit si Iren nga ipalayo kag taguon ang armas-luthang, apang mahimo nga nakuha ini sang pito ka tuig nga bata kag gintiro ang iya amay sa malapitan lamang.
Wala man nanotisyaran nga naga-uyat na sang armas-luthang ang bata bangod sa komosyon sang duha.
Naigo sa liog nga bahin si Lernie kag nakasambit pa ini nga siya ang gintiro sang iya bata antes ini natumba kag nadulaan sang kabuhi.
Ginhingagaw naman ni Iren kuha ang armas-luthang sa bata sang nakita sini nga liwat pa kuntani sini nga tiruhon ang iya amay.
Suno kay Iren, makapila na ka beses nga nagapamahog si Lernie nga patyon siya kag sa tion nga siya ang akig, nagapalupok ini sa gwa sang ila balay.
Nakaagi naman nga nagtaya sang armas-luthang si Lernie sa iya kaugalingon bangod luyag sini nga nga utasonang kaugalingon sini nga kabuhi apang siya ang ginsinggitan ni Iren nga mag-untat, samtang naghambal naman ang bata nga kun tani ginpabay-an na lamang sini nga mapatay ang amay.
Dugang pa ni Iren, masami sila nga naga-away ni Lernie bangod sa pagpangimon sa sulod sang 13 ka tuig na nila nga pag-updanay.
Pahayag ni Iren, makaagi naman sadto nga gintayaan sang bata ang iya amay apang wala naglupok bangod nga wala sang bala kag dugang pa sini, nakakilala kag nakahibalo ang bata sini nga maggamit sang armas-luthang bangod sa ginalantaw sini sa Youtube kag paghampang sang mobile games.
