Napatay na ang isa ka suldado nga katapo sang 79th Infantry Battalion sang Philippine Army nga nauna na nga ginreport nga napilasan kasunod sang nagluntad nga engkwentro batok sa remnants sang Northern Negros Front sang New People’s Army sa Barangay Tamlang, Escalante City, Negros Occidental, kahapon, Hunyo 1.
Sa interview sang Bombo Radyo Bacolod kay 1st Lt Fevie Fajardo, Civil Military Officer sang 79th Infantry Batallion sang Philippine Army, una na nga nareport nga may napilasan nga suldado, apang kagab-i nakumpirmar nga ini ang ginbawian na sang kabuhi.
Wala na ini ginhingadlan pa bangud nag-ayo ang pamilya sang suldado nga indi na pag-idivulge ang iya identity.
Samtang naaresto naman ang ginapatihan NPA member sa ginpatigayon nga joint checkpoint operation sang Armed Forces of the Philippines kag Philippine National Police sa Brgy Mabini, Escalante City, nga ginkilala nga si Junril Bacalso, kag ini ang nakuhaan sang calibre 45 pistol.
Ini ang nakahunong na sa karun sa Escalante City Police Station.
May mga evacuees man bangud sa nagluntad nga engkwentro nga nagdangat sa kapin 50 ka pamilya kag sila ang nagapabilin sa Tamlang Elementary School
Una na nga ginpahayag ni Fajardo nga ginabanta lima ka miyembro sang makawala nga grupo ang naengkwentro sang mga suldado.
Ginahibalo pa sa karun sang mga otoridad kun may yara sang nasamaran sa bahin sang makawala nga grupo.
Suno kay Fajardo, ang mga na-engkwentro sang militar ang responsable sa pagpamatay sa banwa sang Calatrava, Negros Occidental sang Mayo nga ginalakipan sang Mayo 5 sa Sitio Balatuan, Brgy. Dolis, Calatrava, Negros Occidental kun sa diin ang biktima amo si Jemar Mahusay 53 years old kag Mayo 13 sa Proper, Baragna Minautok, Calatrava Negros Occidental kun sa diin ang biktima amo si alyas Gemar.
