Ginbawian sang kabuhi ang isa ka Citizen Armed Force Geographical Unit (CAFGU) matapos masamaran sa likod kasunod sang nagluntad nga engkwentro sa tunga sang makawala nga grupo kag tropa sang 79th Infantry Battalion, Philippine Army sa Barangay Malasibog, Escalante City, Martes sang gab-i, September 29.
Sa interview sang Bombo Radyo Bacolod kay Captain Paulo Lagarde, Civil Military Officer sang 79th Infantry Battalion, samtang ginabiyahe padulong sa balay-bululngan ang CAFGU kaupod ang duha ka nasamaran nga suldado, nakita nga daw indi na maayo ang sitwasyon sini gani gintinguhaan nga ma-revive pa apang ini ang wala na matabangan.
Suno kay Lagarde ang duha ka mga suldado nga nasamaran man sa likod ang yara na sa estable nga kondisyon.
Ang nasamaran nga mga suldado ang may ranggo nga Private First Class kag Sergeant.
Dugang pa ni Lagarde nga mahimo nagahapa ang tatlo sang maigo sang bala sang ila nga kontra.
Sa karun nagapadayon ang clearing operation sa lugar kag hot pursuit operation sa mga nakapalagyo nga mga miyembro sang makawala nga grupo.
Ginkumpirmar sang Civil Military Officer sang 79th Infantry Battalion, Philippine Army nga may yara sang engkwentro nga nagluntad sa Barangay Malasibog, Escalante City, Negros Occidental.
Sa interview sang Bombo Radyo Bacolod kay Captain Paulo Lagarde, alas 3:30 sang hapon, nagapatigayon sang visitation sa lugar ang mga miyembro sang Community Support Program sang 79th IB sang hinali lamang nga ginpalupkan sang makawala nga grupo.
Suno Kay Lagarde, nagdugay sang kapin isa ka oras ang pagbayluhanay sang lupok kag nagpalagyo ang mga rebelde pasado alas 4:00 sang hapon.
Kapin napulo ka mga katapo sang rebelde ang naengkwentro sang militar.
Ginpahayag ni Lagarde nga limitado lamang ang pagpalupok sang tropa bangud may pamalay sa lugar nga nahamtangan sang mga ini.
Kagab-i gindala sa ospital ang tatlo ka pilason apang ginbawian sang kabuhi ang miyembro sang CAFGU bangud sa igo sa likod samtang estable na ang sitwasyon sang duha nga may ranggo nga Sergeant kag Private First Class.
Ginahibalo pa sa karun kun may nasamaran man sa bahin sang mga rebelde.
Ginkumpirmar man ni Lagarde nga wala sang may gin-evacuate nga mga residente.
