Isa patay, duha pilason sa pagbunggu-anay sang duha ka motorsiklo sa East Homes 4, Felisa Road, Brgy Mansilingan, Bacolod City alas-12:26 kaina sang kaagahon.
Ang imbulbado ang ginalakipan sang Rusi nga motorsiklo nga nagabyahe padulong sa norte nga dereksyon samtang ang Bajaj nga motorsiklo ang padulong naman sa sur.
Sa inisyal nga imbestigasyon sang Traffic Enforcement Unit sang Bacolod City Police Office, bangod sa impact sang aksidente ginbawian sang kabuhi ang driver sang Rusi nga ginkilala nga si Alyas Ricky, 50 anyos, samtang pilason naman ang pasahero ni Ricky nga ginkilala nga si Alyas Jolly, 21 anyos, lalaki, nga lunsay residente sang Prk Kabugwason, Brgy Mansilingan.
Pilason man ang driver sang Bajaj nga si Alyas Alejandro, 38 anyos, residente sang Prk Katilingban, Brgy San Miguel, Murcia.
Ang duha nga pilason ang gindala na sa Corazon Locsin Montelibano Memorial Regional Hospital, samtang ang napatay ang gindala na sa punerarya.
