BACOLOD CITY – Gilayon ginbawian sang kabuhi ang driver sang single nga motorsiklo samtang yara naman sa kritikal nga kondisyon ang angkas sini matapos makabunggo sa buli sang Ceres bus nga nagapasaka sang pasahero sa Barangay Poblacion, Valladolid, Negros Occidental, las-5:10 kaina sang kaagahon.
Sa exclusive interview sang Bombo Radyo kay PO3 Lito Ebanda sang Valladolid Police Station, nagapabilin nga wala makilal-an ang mga biktima bangud wala sang makit-an nga identification cards sa mga ini apang ginpahibalo na ang ila nga pamilya paagi sa cellphone nga dala sang mga ini.
Ang driver nagasuksok sang pula nga walking shorts kag itom nga sweat shirt samtang ang angkas ang nagasuksok naman sang brown nga walking shorts kag pula nga sweat shirts.
Ginapatihan nagaedad sang 25 tubtob 30 anyos ang mga ini kag ginalantaw man nga taga-banwa sang La Castellana ukon ciudad sang Canlaon, Negros Oriental.
Suno kay Ebanda, base sa inisyal nila nga imbestigasyon, sa atubang sang simbahan sang Iglesia ni Kristo nagapundo ang Ceres bus nga may ruta La Carlota-Bacolod kag padulong na sa Norte sang hinali sila nakabati sang mabaskog nga paglagapok sa nawala nga bahin sang buli sang bus.
Nasapwan na lamang ang mga biktima nga nagahayaon sa dalan kag lunsay duguon.
Gilayon gindala ang mga ini sa Valladolid District Hospital kun sa diin gindeklarar nga patay na ang driver samtang padayon naman ginabulong ang angkas.
Suno naman sa driver sang bus nga si Remsy Panes, 29-anyos kag pumuluyo sang Barangay Cambarus, Pontevedra, nakahanda ini nga atubangon ang kaso.
Nagpangayo ini sang pasaylo sa pamilya sang mga biktima apang iya ginpanindugan nga wala siya sang sala sa amo nga aksidente.
