Isa ang patay samtang isa ang pilason matapos ginluthang sa sulod mismo sang ila gina-rentahan nga balay sa Purok Sigay, Barangay 2 ciudad sang Bacolod kaina sang aga.
Ang mga biktima ang maglive-in partner kun sa diin ginkilala ang napatay nga si Rhanz Moore Banias, 29-anyos kag residente sang Purok Maabi-abihon, Barangay Banago samtang pilason naman si Mary Liza Pahamutang, 36-anyos sang Purok Sigay, Barangay 2.
Sa interview sang Bombo Radyo Bacolod kay P/Lt. Ma. Liberty Indiape, spokesperson sang Bacolod City Police Office, ginpahayag sini nga padayon pa ang ila imbestigasyon sa motibo sa pagpangluthang sa maglive-in partner.
Nahibaluan nga nagakatulog ang mga biktima sang hinalai lang nga ginsulod sila sang wala makilal-an nga suspetsado nga niwangon nga nagasuksok sang bike helmet, naka-facemask, blue sweat shirt kag naka-dilargo kag ginpangluthang.
Nakaangkon sang isa ka igo sang bala sa natuo nga kamot kag duha ka igo sang bala sa likod sang iya ulo si Banias samtang isa naman ka igo sang bala sa nawala nga mata kag isa ka igo sang bala sa likod ang naagom ni Pahamutang.
Ginhangagaw ang duha dala sa ospital apang gindeklarar nga dead on arrival si Banias samtang padayon naman nga ginabulong si Pahamutang.
Gilayon naman nga nagpalagyo ang suspetsado padulong sa east direction sang Purok Sigay.
Narecover sa crime scene ang lima ka fired cartridges kag isa ka dud bullet.
Suno kay Indiape, ila pa karon nga gina-usisa ang background sang mga biktima apang may yara na sang record sa Police Station 2 si Banias angot sa iligal nga druga.
Suno naman kay alyas Edward, nakasaksi sa insidente, nabatian pa sini si Pahamutang nga nagapakitluoy sa suspetsado nga indi pagtiruhon si Banias.
Suno sa iya, mga anom ka lupok ang iya nga nabatian.
Nahibaluan nga duha pa lamang ka bulan nga naga-arkila sang balay ang maglive-in partner sa lugar.
