Ginklaro sang Philippine Army nga indi si Regie Pacheco alyas Dante, ang isa sa duha ka napatay sa engkwentro sa Sitio Apitong, Brgy Bi-ao, Binalbagan, Negros Occidental sang Enero 30.
Sa interview sang Bombo Radyo Bacolod kay Lt Col Ziegfred Tayaban, Commander sang 94th Infantry Battalion, una na nga naclaim ang bangkay ni Reynaldo Erecre alyas Amik, ang nagaserbe nga tiglikom sang Komiteng Rehiyon Negros ukon pinakamataas nga lider sang New People’s Army sa Negros Island.
Si Amik ang nahibaluan nga residente sang Bohol, apang ang iya bangkay ang ginclaim sang iya utod nga tumandok sang Maco, Davao de Oro sang Pebrero 3.
Wala nahibaluan kun sa Bohol ukon sa Davao de Oro gindala si Amik, apang antes ginbyahe, ang lawas ang ginpacremate sa Bacolod City.
Sa pihak nga bahin, natumod naman nga sala ang una nga identity sa isa pa ka napatay nga NPA member.
Suno kay Tayaban, ang nagkilala sadto kag nagtumod nga si Regie Pacheco alyas Dante, nga logistics officer sang Central Negros 2 ang napatay ang isa man ka former rebel.
Apang sa ulihi, natumod nila nga ang lawas ang iya ni Jimmy Golez alyas Joem, nga residente sang Brgy Inolingan, Moises Padilla.
Si Golez, ang indi logistics officer, kundi miyembro lamang sang Regional Strike Force sang NPA ukon ang ginatawag Red Fighters sa idalom ni Amik.
Gintinguhaan man sang militar nga malab-ot ang pamilya ni Joem, kasubong man ang Punong Barangay sang ila lugar, apang wala gid sang pamilya nga nagclaim sang bangkay.
Bangod sini, ang Binalbagan Municipal Government na lamang ang nagpalubong sa biktima sang sala nga ideolohiya sang Pebrero 4.
