Kapin sa duha na ka semana nga padayon sa gihapon ang pagdagsa sang gurayan sa Purok 2, Barangay Linaon, banwa sang Cauayan.
Sa interview sang Bombo Radyo kay Ronnie Lipanto, residente sang nasambit nga lugar, tubtob sa karun madamo sa gihapon ang nagadagsa nga gurayan sa lawod.
Suno diri, nakaligad sang may yara man sang marot nga isda ang nagdagsa apang sa karun gurayan naman.
Pahayag ni Boss Troy, sang nakaligad nga kapin sa napulo na ka tuig sang may natabo man nga kaangay nga pagdagsa sang gurayan, kag sadto may mga kabataan nga nagkalalumos.
Apang, ginalauman lamang sang mga residente nga wala lang sang malain nga patimaan ang pagdagsa sang gurayan.
Samtang, suno kay Boss Troy, ang ila ginahimo sa karun amo nga sila nagahulog sang kapin sa 200 metros nga pukot kag ginabutong kun sa diin tuman ang kalipay sang mga pumuluyo nga sila makapiyan-piyan sang ila pang adlaw-adlaw.
Sa karun, padayon sila sa gihapon sa paghulat bangod nga madamo sa gihapon sang gurayan nga nagadagsa.
