Ginapaabot na sang pila ka mga analyst nga magapatigayon ang Israeli forces sang ground invasion batok sa Hamas sa masunod nga mga inadlaw.
Sa interview sang Bombo Radyo kay Atty. Jomax Ortiz, wala gid nakapreparar ang militar sang Israel sa pag-atake sang Hamas militants.
Ini ang ikaduha nga kahigayunan nga nalutsan ang Israel bangud sang tuig 1973, wala nagpati ang ila nga prime minister sa intelligence information nga maatake ang mga Arabs sa holiest day sang Israel nga amo man ang natabo sang Sabado.
Suno diri, wala naintercept sang Iron Dome ang iban nga missiles nagikan sa Hamas gani ginapaabot nga igaadjust ang teknolohiya sang Tel Aviv agud indi na ini masulit.
Apang nagapati naman si Ortiz nga wala nalutos ang Israel sa gyera sang tuig 1967 kag 1973 bisan nagbulig ang tanan nga Arab nations samtang gamay naman nga grupo ang Hamas.
Bangud sini, ginapaabot na ni Ortiz nga magapatigayon ang Israeli forces sang ground invasion bangud sa karon, yara na ang tangke de gyera sang Israel sa dulunan kag nagahulat nalang sang order.
Apang ginalauman naman suno sa iya nga mahimo mabutang sa delikado ang mga hostage sang Hamas bangud mahimo nga sila ang isakripisyo.
Nagapati man si Ortiz nga pareho man ang pinsar ni Russian President Vladimir Putin sa iya sang Hamas militants bangud pareho man nga nagapangagaw sang teritoryo kaangay sang ginhimo sang Russia sa Ukraine gani nagpagwa ang Russian president sang statement pabor sa Hamas.
Suno kay Ortiz, naagaw kuntani sang Russia ang Ukraine kun wala nagbulig ang Estados Unidos gani magabulig man ang US sa Israel.
Bangud madamo man sang kaalyado ang US, indi man magpadali-dali ang iban nga pungsod nga mag-apin sa Hamas kaangay sang China kag Iran bangud indi ini makaapin sa Hamas bangud may deal man ang Iran sa US.
