Nagpasalig ang International Solid Waste Integrated Management Specialists, Inc. (ISWIM) nga matapos ang pito ka adlaw mabalik na sa normal ang pagpanghakot sang basura sa ciudad sang Bacolod.
Sa interview sang Bombo Radyo Bacolod kay Councilor Homer Bais, chairman sang Committee on Ecology and Natural Resources, nalo-oy na lamang ini sa mga garbage collector nga bisan naga-inulan, wala untat ang ila paghakot sang basura.
Suno diri, tuman ka dako sang volume sang basura ang nahakot apang ini halit pa nga ginbilin sang IPM Construction and Development Corporation.
Nagapati ini nga mahimo igudang sa multa sa IPM ang mga nabilin nga basura nga wala nila nahakot antes pa man natapos ang ila kontrata.
Suno sa konsehal, gin-una sang ISWIM ang pagkolekta sang basura sa tatlo ka dalagko nga public market sa ciudad kag ginsunod ang mga merkado sa pila ka Barangay.
Sa karun, naga-apelar ini sa mga pumuluyo nga magkooperar paagi sa paghaboy sang basura santo sa schedule nga ginhatag sa kada area.
Pahayag ni Bais, mataas ang expectation sini sa ISWIM, kag kun ano ang pagbantay sini sa IPM sadto mas doble pa gid ang pagbantay sini sa ISWIM nga mahimo ang trabaho sang insakto.
