Naghatag sang pahanumdom ang pamunuan sang Bacolod City Fire Station pagsugata sang bag-ong tuig.
Sa interview sang Bombo Radyo Bacolod kay Senior Fire Officer 4 Jereck Barbas, deputy fire marshal sang Bacolod Fire Station, ginadoble nila ang ila nga effort sa pagkampanya nga Iwas Paputok subong nga nagahilapit na ang pagsugata sang bag-ong tuig.
Suno kay Barbas, ginapangabay nila ang mga pumuluyo nga kun mahimo likawan nalang ang paggamit sang palupok kag mangita nalang sang alternative nga makahimo sang gahod sa pagsug-alaw sang bag-ong tuig.
Suno diri, mahimo gid maggamit sang torotot ukon taklob sang kaldero sa baylo nga palupok.
Nagpanawagan man si Barbas nga likawan ang pagsunog sang guma sa tunga sang dalan bangud ini ang nanotisyaran niya pila na katuig ang nakaligad.
Ginpahayag man sini nga dapat maghaboy sang palupok sa designated firecracker zone sang Barangay kag likawan gid ang paghaboy sa dalan agud nga wala ang madisgrasya.
Panugyan man sini nga indi gid pagpabay-an ang ginaluto.
Nakared alert na sa karun ang Bureau of Fire Protection kag nagapanghatag sila sang fire safety leaflets sa mga lugar kaangay sang bus terminals bilang kabahin sang kampanya agud nga malikawan ang pagluntad sang sunog samtang ginasugata ang bag-ong tuig.
