Ginkumpirmar ni Kagawad Joan Sonota sang Barangay Tangub, Bacolod City nga wala pa nasolbar ang problema sang mga job order employees nga nagprotesta sa barangay hall kahapon bangud indi magpasugot ang barangay treasurer sang ila rekomendasyon antes sila magperma sa payroll.
Sa interview sang Bombo Radyo kay Sonota, ginpahayag sini nga sang nagpadulong ang mga JOs sa barangay hall kahapon, naghambal ini nga hambalun si Barangay Treasurer Ma. Theresa Domadiego nga ihatag ang payroll agud sila ang makaperma.
Suno sa iya, nagcome up sila sa agreement nga permahan ang resolution to hire kag resolution nga magwithdraw kun yara na ang kopya sang payroll kag nagpasugot man diri ang officer-in-charge punong barangay apang si Domadiego naman ang nagpamalibad.
Suno sa iya, indi magrelease sang payroll ang treasurer bangud mando ni Punong Barangay Noli Villarosa nga indi sarang makakuha sang kopya sang payroll ang mga kagawad kag sarang lang sila nga makalantaw.
Suno kay Sonota, simple lang man kuntani ang ila ginapangayo kag ini ang makakuha sang kopya sang payroll, warm bodies sang mga JOs kag ipanagtag ang sweldo sang mga empleyado sa atubangan sang mga kagawan apang indi pa nila mahatag bangud posible may ginatago ang mga ini.
Gin-athag man sini nga indi sila magperma tubtob nga indi mahatag ang ila ginapangayo bangud posible nga gamiton sa indi maayo kun sila ang magperma nga wala pa nahatagan sang paathag ang problema.
