Ginahulat ang augmentation sang mga search and retrieval dogs gikan sa 15th Infantry Battalion sang Philippine Army kag mga personnel gikan sa Metro Manila Development Authority sa pagpangita sang mga namissing sa Negros Occidental.
Sa interview sang Bombo Radyo Bacolod kay Office of the Civil Defense – Negros Island Region Director Donato Sermeno III, sa ila nga record, duha ka dalan na lamang indi malabayan, kag madamo naman sang mga locally-funded nga mga taytay nga naguba, 18 ka mga local government units ang nadulaan sang kuryente kalakip ang 13 sa Negros Occidental, duha sa Negros Oriental kag tatlo sa Siquijor.
Bagsak man ang serbisyo sang telecommunications company kun sa diin 46 percent palang ang nababalik sa Dito Telecommunity, 40 percent sa Globe kag 65 percent sa Smart.
Suno kay Sermeno, sarang na nga makabyahe padulong sa Cebu ang mga gikan sa Negros Island.
Dugang pa sini nga ang pinakamalala nga nahalitan sang Bagyo amo ang Negros Occidental, kun sa diin may narecord na nga 49 nga napatay kag 55 nga missing.
Ginalauman naman nga dako ang mabulig sang mga K-9 Search and Retreival Unit sa pagpangita sang mga missing.
Tuman man kadamo sang mga balay nga nagkalaguba nga sa record nga iya nabatun masobra na sa 500 ang totally damaged.
Nagdeklarar naman sang State of Calamity ang probinsya sang Negros Occidental, Bacolod City, La Carlota City, La Castellana, Hinigaran kag Toboso.
