Nakabaton sang Presidential Commendation ang K-pop supergroup nga BTS sa 5th Korea Good Donation Awards bangud sa ila Love Myself initiative.
Ini ang ginpahayag sang ila nga music label nga Big Hit Music.
Nahibaluan nga ang BTS amo ang una nga Korean artist nga nakabaton sang nasambit nga award.
Ang awarding ceremony ang ginpangunahan sang Ministry of Interior and Safety sang South Korea nga nagahatag sang pagpasidungog sa mga indibidwal kag grupo nga nagapromote sang kaayuhan kag kultura sa pungsod.
Ginpahayag sang grupo nga BTS nga daku nga dungog para sa ila ang amo nga pagkilala kag ginhalad nila ang award para sa ila mga ARMY fans kag nagpanindugan nga padayonon ang ila adbokasiya para sa positibo nga pagbag-o.
Nahibaluan nga ginlunsar ang amo nga inisyatiba sang 2017 upod ang UNICEF Korea.
Ang tinutuyo sang Love Myself campaign amo ang pagpalapnag sang paghigugma sa kaugalingon kag tapuson ang pagpang-abuso sa mga kabataan kag pamatan-on.
Ang inisyatibo ang nakalab-ot na sa 155 ka pungsod kag sa sobra 100 milion nga katawhan nga nakatipon naman sang masobra 9.2 billion won para sa global child protection program sang UNICEF.
Samtang, gin-anunsyar man sang BTS nga nagapreparar sila para sa isa ka world tour kag bag-o nga album nga ilunsar sa spring sang 2026.
