Nagdangat sa P3.8 million ang balor sang halit sa sektor sang agrikultura sa probinsya sang Negros Occidental bangod sa bagyo Kristine.
Santo sa monitoring sang Provincial Disaster Risk Reduction Management Office (PDRRMO) as of 5:00 pm kahapon, 1,906 tanan ka mga pamilya ukon 6,797 ka mga indibidwal ang apektado kun sa diin 951 ka mga pamilya ukon 3,319 ka mga indibidwal ang yara sa sulod sang evacuation centers.
Nareport man nga 80 ka mga brgy gikan sa 15 ka Local Government Units ang apektado sang bagyo kag pagbaha.
Pito ka mga balay ang narekord nga totally damaged samtang 22 naman ang partially damaged.
Sa bahin sang agrikultura, apektado ang pananum kaangay sang humay, mais kag high value crops sang napulo ka LGUs kun sa diin 206 ka mga mangunguma ang apektado nga nagdangat sa P3.2 million ang balor sang kahalitan sa 152.82 nga ektraya sang duta.
Samtang, anum naman ka mga mangingisda ang apektado nga nahalitan sang P575,930.
Sa mga kasapatan naman, pito ka sapat gikan sa apat ka LGUs ang nagkalamatay kag nagdangat sa balor nga P131,564 ang kahalitan.
Wala naman sang may nareport nga casualty ukon missing person sa probinsya.
