Apisar sa makahalanusbo nga sitwasyon sang mga nasunugan sa Brgy 39, Bacolod City, may-ara gihapon sang mga namentaha kag nagapangawat.
Nahibaluan nga Sa interview sang Bombo Radyo Bacolod kay Wendy Castro, Focal Person sang Department of Social Services and Development – Bacolod City, gina-account pa nila ang mga naapektuhan nga pumuluyo.
Sila ang temporaryo nga gintipon sa gym sang Barangay 39, apang indi pagid kumpleto ang ila nga records bangod may mga nagpabilin sa area agud mabantayan ang ila nga balay.
Ini bangod gina-alegar nga madamo sang mga nagapangawat, kun sa diin may mga nadakpan nga nagapangawat sang mga gamit kag kuryente, nga may kaupod pa nga menor de edad.
Ini ang ginsapote sang ginabanta 15 ka mga pumuluyo, antes ginturn-over sa kapulisan.
Aminado si Castro nga kulang ang 40 ka folding beds nga napadala bangod ang iban ang ginpagamit sa mga billeting schools para sa mga atleta sang Negros Island Region Athletics Association Meet 2026.
May-ara naman sang isa ka private school nga nag-offer nga mapagamit ang ila covered court sa pag-akumodar sang mga nasunugan.
Suno kay Castro, ang DSSD ang nakapanghatag na sang 200 boxes sang pagkaon kag tubig para sa mga nasunugan.
