Kahalitan sang sunog sa Amlan Central School sa Negros Oriental, nagdangat sa balor nga P15 million
-- ADVERTISEMENT --

Nagdangat sa kapin P15 million ang balor sang kahalitan nga ginbilin sang sunog nga nagluntad sa Amlan Central School sa Amlan, Negros Oriental sang Sabado, Nobyembre 14, 2026.

Sa interview sang Bombo Radyo Bacolod kay Fire Officer 2 Ian Asentista, Chief Investigation and Intelligence Unit sang Amlan Fire Station, ginabanta nga nagluntad ang sunog alas 12:50 ang takna sa udto kag natawagan sila sang 12:59 samtang nakaabot ang nagresponde ala 01:03 ang takna sang hapon.

Suno kay Asentista, totally burned ang Gabaldon building samtang may yara man sang partially apang gamay lang nga porsyon sang building ang nasunog.

Ginpahayag sini nga ang nasambit nga building ang ginpatukod sadtong 1916 pa kag gin-restore sang 2018.

Ang building ang ginabug-usan sang lima ka mga classrooms kun sa diin ginagamit nga hulot klasehan sang mga estudyante.

-- ADVERTISEMENT --

Nahamtang man sa nasambit nga building ang principal’s office, district office kag conference room.

Dugang pa sang fire investigator nga wala man sang nasamaran sa nagluntad nga sunog.

Suno kay Asentista, ginahibalo pa sang mga ini ang gintunaan sang kalayo nga nagtuga sang sunog matapos nga madamo sila sang anggulo nga gina-imbestigaran.

Ginpahayag sini nga isa sa ginalantaw amo ang gin-install nga solar panel bangud base sa nakita nga video, naghalin ang aso sa mismo kwarto kun sa diin nakabutang ang solar.

Sa assessment indi magnubo sa P15 million ang balor sang kahalitan ang ginbilin sang sunog.

Panugyan ni Asentista sa publiko nga masami nga unahon ang public safety kag tumanon ang pagsulundan sa fire safety agud nga malikawan ang sunog.