Gindula sang militar ang kahangawa sang mga residente may kaangtanan sa deklarasyon sang martial law sa Negros Oriental kasunod sang serye sang pagpamatay sa probinsya.
Una na nga ginpahayag ni AFP spokesperson Brigadier General Edgard Arevalo nga ginatun-an ang martial law declaration sa Negros Oriental matapos nagdangat sa 21 ang numero sang mga ginpatay humalin sadtong Hulyo 18.
Sa interview sang Bombo Radyo Bacolod kay 303rd Infantry Brigade commander Brigadier General Benedict Arevalo, gin-athag sini nga lain ang martial law sadtong panahon ni panahon ni anay Presidente Ferdinand Marcos sangsa subong bangud wala sang suspension sang writ of habeas corpus.
Indi man suno sa iya madula ang gahom sang local government officials nga nagapamuno sa ila banwa.
Kaangay sang martial law nga in effect sa Mindanao subong, wala man suno sa iya sang reklamo tuhoy sa human rights violations.
Mas maayo gani kun may batas militar suno kay Arevalo bangud mas madamo ang checkpoint operations sa bisan diin nga bahin sang probinsya kag madugangan ang numero sang tropa sang gobyerno sa Negros Oriental nga wala na sang dugang nga kwestyon.
Ang dugang nga mga suldado suno sa army commander ang ginapasalamatan sang mga residente kaangay sadtong ginpatuman ang Comelec control sa Moises Padilla, Negros Occidental sadtong election period.
Sa pihak sini, magadepende gihapon kay Presidente Rodrigo Duterte suno kay Arevalo kun magadeklarar ini sang batas militar sa Negros Oriental.
