Ginalantaw sang Murcia Municipal Police Station nga mahimo gintutdan ang kalabera sang tawo nga nasapwan sa katubuhan sa Hacienda Valing, Brgy. Blumentritt, Murcia, Negros Occidental, Lunes sang hapon, July 8.
Sa interview sang Bombo Radyo kay Police Staff Sgt. Vonn Carlo Cagalawan, investigator sang Murcia Municipal Police Station, ang kalabera ang nasapwan ni Noel Dolar, residente sang nasambit nga lugar, samtang ini ang naga-arado sa kampo.
Nakita ni Dolar nga may gintaban ang ido nga tul-an kag sang iya ginsundan, nakita niya ang kalabera sang tawo.
Suno kay Cagalawan, wala sang bagul ang tawo apang yara ang gusok, spinal column, legs kag pelvic bones.
May yara man sang gray nga brief gani ginapatihan nga lalaki ang biktima.
Sa pagbanta sang mga pulis, mahimo nga tatlo tubtub apat na ka bulan sa lugar ang kalabera.
Sa pag-usisa sa mga residente malapit sa lugar, natalupangdan man nila ang mabaho nga dapya sang hangin apang wala sila naglaom nga may patay nga tawo sa katubuhan.
Wala naman sang may nareport nga missing person sa Murca gani nagapati ang kapulisan nga ginhal-id lang sa lugar ang biktima.
