BACOLOD CITY-Malapit P400,000 nga balor sang suspected shabu ang narekober sa lalaki nga nadakpan sa buybust operation sa ciudad sang San Carlos, Negros Occidental kahapon.
Sa interview sang Bombo Radyo Bacolod kay Police Major Mark Anthony Jungco, hepe sang San Carlos City Police Station, ginpahayag sini nga natigayon nga madakpan ang suspetsado nga ginkilala kay Junlyn Mahinay, 23 anyos, single kag residente sang Brgy. 5, San Carlos City.
Natigayon nga makuha sa paghinakop sini ang siyam ka heat-sealed transparent sachet sang suspected shabu, home made shot gun kag iban pa nga drug paraphernalia.
Ginabanta nagabug-at sang 32 grams ang nakompiskar nga suspected shabu kag nagabalor sang P384 mil.
Suno kay Jungco, si Mahinay ang isa ka street level target kag anay trisikad driver nga nangin pusher.
Natigayon ang nasambit nga buybust operation paagi sa koordinasyon sang Philippine Drug Enforcement Agency Region 6 (PDEA 6) kag mga katapo sang San Carlos City Police Station.
Sa karun, nakahunong sa San Carlos City Police Station ang suspetsado kag nakatalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002 kag RA 10591 ukon “Comprehensive Firearms and Ammunition Regulation Act”.
