BACOLOD CITY-Malapit sa P900,000 nga balor sang suspected shabu ang nakumpiskar sa isa ka babaye sa buybust operation sa Dumaguete City, Negros Oriental kagab-i.
Alas-9:10 kagab-i sang ginpatigayon ang buybust sang gintingob nga pwersa sang Provincial Drug Enforcement Unit (PDEU), Dumaguete City Police Station, Philippine Drug Enforcement Agency (PDEA) kag 702nd Maritime Police batok sa subject nga si Elena Dales Merced alyas “Tomboy”, “Diklum”, “Bodo”, nga isa ka high value target, provincial level.
Naga-edad sang 43 ang suspetsado, single kag residente sang Sta. Catalina Street, Barangay Poblacion 4, Dumaguete City.
Nakuha sa paghinakop sang suspetsado ang isa ka small sized heat sealed; isa ka big heat sealed kag isa ka medium sized heat sealed plastic sang suspected shabu.
Dugang pa nga nakuha sa paghinakop sini ang isa ka sling bag, cellphone, motosiklo kag buybust money nga nagabalor sang P1,500.
Nagabug-at sang 125 grams ang suspected shabu nga nakumpiskar sa buybust kag may DDB value nga 850,000.
Priso na sa Dumaguete City Police Station si Merced samtang ginpadala naman sa Provincial Crime Laboratory para sa eksaminasyon ang mga nakumpiskar nga ginapatihan iligal nga druga.
