Patay ang isa ka lalaki matapos ginluthang sang duha ka wala makilal-an nga mga suspetsado sa Barangay Banago, Bacolod City pasado alas-9:00 sang Huwebes sag gab-i, Pebrero 19.
Ginkilala ang biktima nga si Joefrey Jaducan, 44 anyos, tricycle driver kag residente sang nasambit nga lugar.
Sa interview sang Bombo Radyo kay PLt Malbert Veloso, Deputy Chief of Police sang Bacolod Police Station 3, nagapungko ang biktima sa iya nga tricycle samtang naga-istorya sa iya upod sini nga lalaki sang ini ang ginpalapitan sang duha ka wala makilal-an nga persona kag hinali nga gintiro.
Ang biktima ang may igo sang bala sa kamot kag sa iya dughan nga nagresulta sang iya kamatayon.
Gilayon naman nga nagpalagyo ang mga suspetsado matapos ang krimen.
Suno kay Veloso, sa karun, may ara na sila sang person of interest samtang padayon pa ang ila imbestigasyon agud matumod ang motibo sang krimen.
Base sa rekord sang kapulisan, ang biktima ang naserbehan na sadto sang warrant of arrests kag amo ini subong ang ila nga gina-retrieve agud mahibaluan kun sin-o ang complainant.
Nagapanawagan naman si Veloso sa mahimo nga nakawitness kag makahatag sang impormasyon nga makig-angut sa kapulisan agud mapadasig ang pagdakop sang mga suspetsado.
