Nagpadala na sang request ang mga kapulisan para sa mga natumod nga CCTV cameras nga mahimo may footage angot sa natabo nga pagpatay sang pulis sa Sibulan, Negros Oriental sa tatlo ka pulis kag isa ka sibilyan.
Sa pahayag ni Police Regional Office Negros Island Region Director Police Brig Gen Arnold Thomas Ibay, may mga natumod na sila nga mga establishimento nga may CCTV camera sa lugar kun sa diin natabo ang mga pagpangluthang ni Police Staff Sgt Bonifacio Saycon.
Madumduman nga una ginpatay ni Saycon ang Guest Relations Officer (GRO) sang SAB Resto Bar nga si Chiela Mae Dinawanao gamit ang cal. 45 pistol.
Samtang pabalik sa Sibulan Municipal Police Station sakay sa pribado nga salakyan sang hepe nga si Police Captain Jose Edrohil Cimafranca upod sanday Police Senior Master Sgt Tristan Chua kag Patrolman Rey Albert Temblor, sila ang ginpangluthan man ni Saycon gamit ang cal. 9mm pistol.
Nahibaluan nga may naggwa na nga CCTV footage gikan sa bar nga nagapakita nga magkaupod ang suspect kag mga biktima nga pulis nga naga-inom sang matabo ang una nga krimen.
Apang suno kay Ibay, santo sa protocol sang Regional Anti Cybercrime Unit kinahanglan nga magpadala sang request para sa extraction sang CCTV footage bangod indi magbatun ang korte kun basta nalang magkuha gamit ang cellphone agud gamiton nga ebidensya.
