Ang pagpalangga sang isa ka ginikanan sa bata ang indi matupungan kag ginahimo ang tanan nga masarangan agud nga mahatag lamang ang kinahanglan kag masuportahan ang mga ini.
Kaangay lamang sang atleta nga naghampang sa Negros Island Regional Athletic Association Meet (NIRAAM) 2026 nga ginbaligya sang iya amay ang ila karbaw agud nga may yara siya sang pamasahe agud nga maghampang sa regional meet.
Sa interview sang Bombo Radyo Bacolod kay Jonel Metoda Jr, javeline throw player nga nagikan sa Filomeno Pascual Elementary School sa Sagay City, Negros Occidental nga dako ang pagpasalamat sini sa suporta sang iya nga ginikanan.
Ang iya gingamit sa pag-training amo bangkaw nga ginhimo man sang iya amay.
Si Metoda ang nagchampion man sa iya nga hampang kag siya ang magahampang sa Palarong Pambansa.
Ginpasalamatan sini ang iya ginikanan kag ang ila alkalde kag mga manunudlo nga nagsuporta sa iya.
