Nagdangat na sa lima ang kaso sang cholera sa Negros Occidental.
Sa interview sang Bombo Radyo kay Provincial Health Officer Dr. Ernell Tumimbang, tatlo ka mga kaso sang cholera ang narekord sa Silay City samtang tag-isa naman sa EB Magalona kag Victorias City.
Suno kay Tumimbang, kahapon ginrekomendar sang PHO sa Silay City Government nga magdeklarar sang cholera outbreak sa Brgy. Guinhalaran matapos nagtaliwan ang 88-anyos nga babayi sang Domingo sa Teresita Lopez Jalandoni Provincial Hospital (TLJPH) bangud sa cholera.
Suno diri, kahapon sang aga, nagpadulong sila sa Silay agud imbestigahan ang ginatunaan sang diarrhea sa ciudad; tsekyaron ang mga tikang sang local government unit; kag naghatag sang mga rekomendasyon kay Mayor Joedith Gallego kag sa City Health Office agud nga i-address ang mga kaso sa Barangay Lantad kag Guinhalaran.
Ginrekomendar sini nga magfocus ang LGU sa Guinhalaran partikular na sa ginakuhaan sang tubig kag imbestigahan kun diin nagkuha sang tubig ang infected nga mnga pasyente.
Suno kay provincial health officer, magluwas sa unsanitary nga tubig kag pagkaon, makatuga man sang cholera kun ang food handler ang asymptomatic apang nagasuprer sang nasambit nga balatian.
Nagapanugyan si Tumimbang nga tsekyaron gid ang mga ginagwaan sang higko sang tawo bangud posible ini nga makacontaminate sa water supply kun may leakage ang mga tubo.
Ginarekomendar man sini nga i-chlorinate ang mga tubig kag pabukalon sang 20 ka minutos kun indi sigurado sang ginakuhaan.
Dapat nga imonitor ang mga bubon suno sa iya kag i-inspect ang mga water refilling stations sa ciudad.
Suno diri, 25 tubtob 50 porsyento sang cholera ang posible nga magluntad sa moderate tubtob severe dehydration.
Sa pagdeklarar naman sang oubreak ukon epidemic sa isa ka barangay, sarang ini nga madeklarar kun nalab-ot na ang epidemic threshold.
