Luyag ni Sen. Imee Marcos nga imbestigaran in aid of legislation ang komprontasyon sang Philippine Navy kag China Coast Guard sa Ayungin Shoal sa West Philippine Sea sang Lunes, Hunyo 17, kun sa diin nautod ang tudlo sang isa ka Navy personnel.
Nahibaluan nga ginbuno sang China Coast Guard personnel ang inflatable boats sang Philippine Navy gani ini ang nagkupos, samtang ginkuha man ang walo ka high-powered firearms sang tropa.
Suno kay Marcos, chairperson sang Senate Committee on Foreign Relations, dapat imbestigaran ang natabo kun sa diin nautod ang kamalagko sang isa ka Navy personnel agud madeterminar kun ano ang himuon sang gobyerno agud nga maproteksyunan ang tropa kag mga sibilyan nga nagadala sang pagkaon kag supply sa mga suldado nga nagatinir sa BRP Sierra Madre sa Ayungin Shoal.
Ang BRP Sierra Madre ang hungod nga ginpasadsad sang gobyerno sang Pilipinas sa Ayungin Shoal sang tuig 1999 agud magserbe nga outpost sang Philippine Marine Corps kag mapakita nga ang baybayon ang yara sa sulod sang Exclusive Economic Zone sang pungsod.
Sa Senate Resolution 1055 nga ginfile sang presidential sister, tuyo sang imbestigasyon nga matumod kun ano ang mga pagbag-o nga dapat himuon sa ginagamit nga strategy subong agud nga mapamilit ang sovereign rights sang Pilipinas sa West Philippine Sea.
Suno kay Marcos, ang insidente sang Hunyo 17 ang nagapakita sang pagka-agresibo sang People’s Republic of China sa pag-intercept sang rotation kag resupply missions sang Pilipinas sa Ayungin Shoal.
Ini ang una nga kahigayunan suno sa iya nga nagsakay ang Chinese personnel sa duha ka Filipino military boats, nagkuha sang mga armas kag nagpilas sang isa ka military personnel.
