Ginpahayag sang nagpost sang litrato sang konduktor nga gina-alegar akig pa apisar wala naghatag sang nagakadapat nga sensilyo nga mahangpan sini kun nalipat gid man maghatag sang sensilyo apang indi ini ang natabo.
Sa exclusive enterview sang Bombo Radyo Bacolod kay Miles Villaruz, residente sa banwa sang Binalbagan, ginsaysay sini nga siya ang nagsakay sa Ceres Bus nga may routa Binalbagan-Bacolod kaina sang aga
P200 ang kwarta sini nga ginbayad samtang P125 naman ang iya nga ticket, apang wala sang sensilyo ang konduktor.
Ini ang nahangpan naman sang pasahero, kapin alas-11:39 sang udto, sang ini ang malapit na sa destinasyon, halos makatatlo sini nga ginremind ang konduktor apang kaangay nga siya ang ginapabungulan lamang kag wala gina-atubang.
Tubtob nga nakadangat na sa atubang sang Bacolod Police Station 6 sa Barangay Taculing, kun sa diin ini magapanaog.
Suno kay Villaruz, sa pagpanaog, liwat sini ginsukot ang konduktor, apang ini pa ang akig kun sa diin luyag sini nga sa terminal magpanaog ang pasahero.
Apang paathag ni Villaruz, nga walking distance na lamang gikan sa Bacolod Police 6 ang iya trabaho, kag malayo na kun magapanaog ini sa Ceres terminal.// Suno diri, akig ang konduktor sang naghambal nga “ari ho singkwenta, daw indi ka kahulat!”.
Ginbatun na lamang ni Villaruz ang P50 apisar nga P75 kuntani ang iya sensilyo.
Natingala man ini kun paano nga sa kalawigon sang byahe gikan sa banwa sang Binalbagan padulong sa ciudad sang Bacolod kag sa kadamuon sang pasahero, wala gid ini nakatipon sang sensilyo.
Dugang pa sini nga kaangay nga siya lamang ang wala masensilyuhan sa tanan nga pasahero.
Suno kay Villaruz mahangpan sini kun nagpangayo sang pasaylo ang konduktor bangod sa kulang nga sensilyo, apang nagakurog ini sa kaakig bangod kaangay nga ginpakahuy-an pa ini kag siya pa ang nagagwa nga may sala.
Ginkabisado man sini ang plate number sang Ceres nga AAC7889, apang wala sini matandaan ang body number.
Bangod sa pagviral sang iya nga post sa facebook, siya ang gincontact man sa messenger sang personnel sa Vallacar Transit Inc. kag natalana nga mag-atubangay.
Suno kay Villaruz, nakadepende sa akto sang konduktor kun ini ang iya ipasettle, apang kun makita nga arogante ini gihapon, magasunod ini sa panawagan sang madamo nga netizen nga ini ang hatagan sang leksyon.
