Nagahingyo sang suporta gikan sa pumuluyo si Agri Partylist Representative Wilbert Lee sa panawagan sini nga magamit sa healthcare services sang Department of Health ang masobra P504 billion nga pondo sang Philippine Health Insurance Corp. (PhilHealth).
Ini kasunod sang mainit nga pagsabtanay nanday Lee kag DOH Secretary Teodoro Herbosa sa ginpatigayon nga budget briefing.
Sa interview sang Bombo Radyo Bacolod sa kongresista, eksakto isa ka tuig subong, ginbatikos man sini sa budget hearing ang masobra P400 billion nga kwarta sang PhilHealth nga nakadeposit lamang sa bangko.
Suno diri, mas nagakaangay nga Phil Invest na lamang ang itawag sa PhilHealth kun indi man gamiton ang kwarta gikan diri para sa healthcare needs sang mga pumuluyo.
Apang sa budget hearing, nag-ayo si Herbosa nga hatagan ini sang gamay nga tion tubtob sa katapusan sang tuig, apang ini ang indi mabatun ni Lee sa panindugan nga sa kada adlaw madamo sang nagakapatay kag indi na mahulat pa ang katapusan sang tuig.
Panindugan sang kongresista nga ang healthcare ang indi kaangay sa infrastructure projects nga sarang lamang mapostpone bangod kabuhi ang gina-estoryahan.
Dugang pa sini nga pila ka semana na nga gina-awayan ang budget nga P90 million, sa pihak nga nagasulobra ang wala ginagamit nga kwarta.
Apisar ginpasakaan ang medical benefits sang pila ka malala nga balatian kaangay sa cancer kasubong man ang numero sang libre nga dialysis, ini ang kulang gihapon kag madamo pa sang balatian nga dapat maaddress.
Paathag ni Lee nga ang DOH Secretary amo ang nagapamuno sa Benefits Committee, kag derektiba sang ahensya ang pag-ulikid sa ikaayong lawas sang publiko.
Suno diri, wala sang pulos ang pwesto sa gobyerno kun wala man ginatuman ang mandato.
Panugyan ni Lee nga siya ang pahanugutan nga maglead sa meeting sang benefits committee agud lamang mapadasig ang pag-aprubar kag magamit ang pondo sang nagakinahanglan partikular na sang mga pigado.
