Padayon pa ang imbestigasyon sang Bacolod Police Station 2 angot sa paghold-up sa konsehal sang Bago City, Negros Occidental sang tinalikdan nga Miyerkules sang hapon kun sa diin gincarnap pa ang awto sini.
Suno kay Bago City Mayor Nicholas Yulo, si City Councilor Cleo Gaudite ang nagpangape sa Starbucks kag pauli na kuntani alas-3:00 sang hapon.
Pagsaka sang konsehal sa iya salakyan nga Mitsubishi Mirage, ginapahayag nga nagsaka man ang duha ka mga suspetsado kag ginhambalan ang opisyal nga mabiya sila sa lugar kag siya man ang nagmaneho sang kotse.
Nagmandu ang mga suspect nga mapadulong sa Imperial Court sa dalan Gatuslao kag pagsulod sa Room 56, diri nagdeklarar sang hold-up ang mga suspetsado.
Ila nga gintapungol ang konsehal kag ginkuha ang wallet kag cellphone, antes nagbiya sa lugar sakay sa salakyan sang opisyal.
Ginbungguan pa nila ang pwertahan sang motel agud nga makapalagyo.
Ginbilin sang mga suspetsado si Gaudite.
Suno kay Yulo, daw kaangay nga abduction ang natabo bangud ginpilit sang mga suspetsado ang konsehal nga magdrive kag ila pa nga gindala ang salakyan.
Gin-athag naman sang alkalde nga wala sang ransom nga gindemand ang mga suspetsado.
Wala nagpanugid sa mga pulis si Gaudite angot sa natabo sa iya.
