Plano sang konseho sa ciudad sang Bacolod ang pagpasar sang resolusyon nga magapahugot pa sa security measures sang mga eskwelahan.
Sa interview sang Bombo Radyo Bacolod kay Bacolod City Councilor Atty Caesar Distrito, ang una nga resolusyon ang nagapangabay sa Bacolod City Police Office, Department of Education division of Bacolod City, Commission on Higher Education, mga Barangay, kag Private Education Institution nga mapabaskog pa ang implementasyon sang Gun Free School Zone, basi sa Republic Act 10591n ukon Comprehensive Firearms and Ammunition Regulations Act, nga nagadumili sang armas-luthang sa mga eskwelahan.
Ang ikaduha nga resolusyon ang nagapanawagan naman sang madasig kag komprehensibo nga assessment sang Campus Assessment Access Control kag Emergency Response Protocol sa mga eskwelahan sa ciudad partikular na sa High School kag Kolehiyo.
Kalakip diri ang assessment kun preparado na ang entry kag exit controls, visitor identification and management, deployment sang security personnel kalakip na ang parameter security, CCTV system, emergency communication kag alarm system, evacuation and lockdown procedures, kag kun paano makakoordinar sa mga kapulisan kag emergency response.
Pinaagi sini mapunggan ang pagpasulod sang armas sa mga eskwelahan.
Ini ang kasunod man sang natabo nga pagpaniro sang estudyante sa Ateneo de Zamboanga University Junior High School Campus, kasubong man sa nakaligad nga pagpaniro sang duha ka estudyante sa San Jose National High School sa Tacloban, kag ang pagpamuno sang estudyante sa Bacolod City.
Panindugan ni Distrito nga indi dapat mangin reactionary, nga magahulag na lamang kun may natabo na.
Suno diri, dapat mangin prayoridad ang seguridad sang kabataan agud mangin matawhay man ang pinsar sang mga ginikanan nga safe ang ila nga bata, kag madula man ang kahadlok sang kabataan sa mahimo matabo sa ila sa pagsulod sa buluthuan.
Panawagan pa ni Distrito nga ang hugot nga seguridad ang mangin permanente kag indi nga sa umpisa lamang ang kasaw.
