Pabor ang convenor sa Kontra Daya sa pagpatigayon sang internet voting sa 2025 midterm elections apang panawagan sini nga ihatag sa Filipino IT experts ang pagmanage sang Automated Election System.
Sa interview sang Bombo Radyo Bacolod kay Professor Danilo Arao, long overdue na ang internet voting nga dapat kadungan nga na-implementar sang ginsuguran ang Automated Election System.
Nagapati ini nga pinaagi sa internet voting mapasa ang voter turn out nga sa karun yara sa 70 porsyento sang tanan nga able voters.
Paathag ni Arao nga ang pinakatarget amo nga masarangan na nga mapatigayon ang pagboto bisan lamang yara sa balay, kag mas maayo nga ini ang accessible pinaagi sa mobile phones kag cross platform compatible sa parehas nga ios kag android.
Apang samtang wala pa ang kaangay ka advance nga paagi, sarang man nga makatukod sang internet voting sites ang mga banwa kag ciudad ukon sa mga malls.
Apang pahanumdom sini nga dapat transparent ang proseso kag mangin bukas sa publiko ang source code.
Dugang pa sini nga masarangan na sang Filipino IT experts ang maghimo sang system kag indi kingahanglan nga padalaganon sang mga foreign companies kaangay sang Smartmatic kag Miru.
Pahanumdom sini nga kalabanan sa mga cyber-attacks sa Pilipinas ang gikan sa foreign entities, kag kaangay sa Smartmatic, kwestyonable man ang record sang Korean firm nga Miru.
