BACOLOD CITY — Gin-into lamang nanday anay Presidente Benigno Aquino III kag anay Senador Mar Roxas sanday Governor Alfredo Marañon Jr. kag anay Governor Lito Coscolluela sadtong gintukod ang Negros Island Region.
Ini ang ginpahayag ni Mayor Magdaleno Peña sang banwa sang Moises Padilla, nga nagaserbe man subong nga consultant sang Philippine Drug Enforcement Agency (PDEA), sa exclusive interview sang Bombo Radyo.
Suno kay Peña, gintukod lamang nanday Aquino kag Roxas ang NIR apang wala man ginpainan sang budget sadtong tuig 2015 kag 2016.
Kun seryoso ang mga ini nga hatagan sang katumanan ang madugay na nga ginahandum nga one island region sa Negros, suno kay Peña, kuntani ginlakip nila ang separado nga budget sang Region 18 sa General Appropriations Act (GAA) sadtong yara pa sila sa pwesto.
Suno kay Mayor Peña, ginpadaog nanday Marañon, Coscolluela kag sang pumuluyong Negrosanon si Roxas sang tinalikdan nga 2016 elections apang subong nagapangayo sang 19 bilyones pesos nga budget para sa NIR gikan sa nagdaog nga si Presidente Rodrigo Duterte nga magamay lamang ang nakuha nga boto diri.
Suno pa sa iya, nagsala ang pumuluyong Negrosanon sa pag-upod kay Roxas sadtong 2016 general elections rason nga ginbungkag ang NIR.
Suno kay Peña, manami ang ideya sang paghugpong sang Negros Occidental kag Negros Oriental paagi sa paghimo sa ila bilang isa ka rehiyon apang ang problema amo ang ginhimo nanday Governor Alfredo Marañon Jr., Coscolluela kag sang mga Negrense nga nag-upod kay Roxas sa piniliay.
Sa madumduman nga gintawag ni Marañon nga buang si Duterte samtang ginhangkat naman siya sang tapungulay ni Coscolluela sang magpaguwa sang sex jokes si Duterte antes ang eleksyon.
Suno kay Peña, kun wala gin-insultuhan nanday Marañon kag Coscolluela si Duterte, mahimo nga mamag-an ang buot sini para sa mga Negrosanon.
Ginsuhestyon naman ni Mayor Peña ang pagpili sang madason nga gobernador sang Negros Occidental nga abyan ni Presidente Duterte.
Suno sa PDEA consultant, kun malapit sa presidente ang madason nga gobernador, mahimo nga magbag-o pa ang paminsaron sini sa pagdula sang NIR.
Nagalaum man si Peña nga mapapas na ang ilegal nga druga sa Negros agud maapresyar sang presidente ang probinsiya.
