Tatlo ang ginaltutukan sang kapulisan nga mahimo motibo sa pagpatay kay Punong Barangay Dennis Oliveros Jimpayan sang Brgy Kansumandig, La Libertad, Negros Oriental.
Sa interview sang Bombo Radyo Bacolod kay Police Col. Jonathan Abella, Acting Provincial Director sang Negros Oriental Police Provincial Office (NorPPO), ang ginatutukan nga motibo amo ang posibilidad nga ang krimen ang may kaangtanan sa Communist Terrorist Group (CTGs), third party sa lovelife, ukon angot sa iya trabaho bilang Punong Barangay.
Suno kay Abella, ang Barangay ang boundary na padulong sa ciudad sang Guihulngan, gani ini ang nagaserbe man nga mobility corridor ukon lalabyan sang mga nagatabok-tabok nga makawala nga grupo.
Isa pa sa motibo nga ginalantaw ang posibilidad sang love triangle, apang wala na naghatag pa sang dugang nga detalye ang NOrPPO official.
Samtang ang ikatatlo nga motibo amo ang may kaangtanan sa iya trabaho bilang Punong Barangay.
Si Jimpayan ang nagpungko bilang Punong Barangay sang 2023, apang luwas diri, siya ang makapila naman nga nakapungko sa nasambit nga pwesto humalin pa sadto.
Nagapati man si Abella nga mahimo magdamo pa ang mangin willing nga maghatag sang ila testimoniya matapos mag-pledge si Negros Oriental First District Representative Emmanuel ‘MM’ Iway nga siya ang magahatag sang reward nga P100,000 sa pagsolbar sang kaso.
Suno diri, dako nga bulig sa paghaylo sa mga witness ang paghatag sang padya, apang pasalig niya nga tsekyaron man sang kapulisan kun makabulig kag lehitimo ang mga impormasyon.
Nahibaluan nga nagtukod na ang Police Regional Office Negros Island Region sang Special Investigation Task Group para sa madasig nga pagsolbar sa kaso.
