Naga-apelar ang secretary general sang General Alliance of Workers Association (GAWA) sa mga mamalidha nga maghimo sang resolusyon nga temporaryo nga magasuspinder sang pagpatuman sang scheculed increase sang contribution sa Philippine Health Insurance Corporation (PhilHealth) sini nga 2021 sa tunga-tunga sang ginapangatubang nga pandemya.
Madumduman nga sa idalom sang Universal Health Care law, ginamando ang pagpasaka sang PhilHealth contributions kada tuig sugod sang 2020 kun sa diin dapat makalab-ot ini sa 5% sang monthly income sa tuig 2025 agud nga mapasiguro ang long-term actuarial sustainability sang system.
Gin-anunsyar sang state-run insurer nga sugod subong nga Enero, mapatuman na sila sang higher monthly premiums nga magasaka sa 3.5% sang monthly income nagikan sa 3%.
Sa interview sang Bombo Radyo Bacolod kay GAWA secretary general Wennie Sancho, ginpahayag sini nga kuntani magahimo sang tikang ang mga mamalidha ang nga temporaryo nga mapauntat ang amo nga kasuguan bangud dugang naman ini nga balayran sang mga mamumugon kun sa diin ang mga sweldo ang apektado na tuga sang pandemya.
Suno sa iya dugang naman ini nga balakhuon sang mga empleyado.
Nagahingyo man ini sa pamunuan sang ahensya nga ipaathag kuntani sa publiko kun sa diin nagakadto ang kwarta.
Madumduman nga sang nagligad nga Agosto, nagpanaog sa pwesto si anay PhilHealth President kag CEO Ricardo Morales kasunod sang pagbuyagyag sang isa ka whisteblower employee angot sa nagkalain-lain nga illegal schemes sa ahensya nga nagdula sang P15 billion nga pondo sang PhilHealth.
