BACOLOD CITY — Gindula sang bise gobernador sang Negros Occidental ang kahangawa sang mga pumuluyo nga maapektuhan ang basic services nga mahatag sang provincial government sa masunod nga tuig bangud sa pagnubo sang Internal Revenue Allotment ukon IRA nga mayor nga source sang pondo.
Ini ang pasalig ni Vice Governor Eugenio Jose Lacson kasunod sang impormasyon nga maganubo ang IRA share sang Negros Occidental sa tuig 2018.
Subong nga tuig 2017, P3.2 bilyones ang pondo sang probinsya kag P2.8 bilyon ang IRA samtang ang iban ang nagikan sa local income, hospital operations kag economic enterprises.
Suno kay Lacson, wala pa nahibaluan kun pila ang iganubo sang IRA kag kun ano ang rason sang pagnubo.
Ang klaro lamang amo ang mandu ni Governor Alfredo Marañon Jr. nga panubuan sang mga opisina sa kapitolyo ang maintenance and other operating expenses agud nga magamit pa ang pondo sa sweldo sang mga empleyado bangud sa implementasyon sang 3rd tranche sang Salary Standardization Law 4 sumugod sa bulan saang Enero.
Suno kay Lacson, sarang lamang sila nga makapasar sang supplemental budget sa masunod nga tuig pananglitan kinahanglanon ang dugang nga pondo.
